【#第一文档网# 导语】以下是®第一文档网的小编为您整理的《粗心的妈妈 广播剧剧本》，欢迎阅读！
粗心的媽媽 廣播劇劇本 旁：小獅子毛爾冬喺森林散步，佢拎住一朵好靚嘅花，一路行，時不時聞一聞，突然間，佢聽到一下尖叫聲。 鳥：救命呀！ 旁：一隻雀仔喺樹上跌緊落嚟啊，毛爾冬即刻伸出手，用佢朵花去接住隻雀仔。 毛：唔駛驚，我嚟救你！ 旁：但係雀仔太重喇，朵花根本接佢唔住，結果雀仔跌咗落地。（加入重物掉到地上的聲音）仲暈咗添呀！雀仔好可憐啊，毛爾冬抱起雀仔，心入面好難過，仲喊起上嚟。 毛：嗚嗚~~對唔住呀！雀仔，我唔知會咁㗎，等我嚟救返醒你啦。 旁：毛爾冬諗，凍水應該可以令雀仔醒返，於是佢就攞咗一大桶凍水嚟，然後將雀仔㩒入水裡面，仲不停咁叫佢。 毛：雀仔，雀仔，快啲醒喇！ 旁：雀仔終於醒返喇！仲喺水入面不停咁吐出泡泡。毛爾冬即刻將雀仔拎返出嚟。 毛：雀仔，你醒返啦?! 旁：但係雀仔吐咗一大啖水出嚟，開口就怨毛爾冬。 鳥：我醒返喇！你頭先差啲浸死我呀！ 毛：下?!咁你宜家有冇事呀？ 鳥：我隻腳受咗傷！仲流血啊，你可唔可以幫我包紮下呀？ 毛：無問題！我一定會醫返好你。 旁：毛爾冬攞咗一張大被單，幫雀仔包紮傷口。張被單實在太大啦，雀仔俾佢包到實晒，掙啲透唔到氣。 鳥：放開我！救命呀！ 旁：毛爾冬拿拿聲拎開張大被單。 毛：唔好意思，我太粗心喇！你咁細隻，我點可以用咁大嘅繃帶嚟幫你包紮傷口吖？ 旁：毛爾冬喺張大被單嘅中間，剪咗一細塊布，幫雀仔包住受傷嘅腳，然後又問。 毛：你一定好肚餓喇？ 鳥：係啊。 旁：毛爾冬就即刻拎起個蘋果，咬咗一大啖，塞入雀仔個口入面。 鳥：咳、咳、咳。 旁：啊~~毛爾冬又唔記得咗，雀仔個口好細㗎咋，今次佢將蘋果咬爛，再餵俾雀仔食。 毛：你仲要飲啲湯。 旁：毛爾冬又拎嚟一大碗熱湯，「畢」一羹俾雀仔飲。啊，毛爾冬又唔記得，啲湯好熱㗎，雀仔瘌到呱呱叫，毛爾冬先醒起要吹凍啲湯。 鳥：你真係好似我媽媽呀！不過你就粗心咗啲。 本文来源：https://www.dywdw.cn/241e8588d0d233d4b14e698f.html
下载此文档
搜索文档
阅读：
文档下载
2023-10-02
